काठमाडौं । आगामी विजया दशमीलाई लक्षित गरी नेपाल राष्ट्र बैंकले सुकिला नोट सटही (नयाँ नोट बदल्ने) समय सार्वजनिक गरेको छ।
राष्ट्र बैंकको मुद्रा व्यवस्थापन विभागले जारी गरेको सूचनाअनुसार सुकिला नोट सटही भदौ २९ गतेदेखि असोज १० गतेसम्म सञ्चालन हुनेछ।
यस अवधिमा थापाथलीस्थित राष्ट्र बैंकको मुद्रा व्यवस्थापन विभाग, विराटनगर, जनकपुर, वीरगञ्ज, पोखरा, सिद्धार्थनगर, नेपालगञ्ज र धनगढीस्थित प्रदेशस्तरीय कार्यालयहरूबाट नयाँ नोट सटही गर्न सकिने उल्लेख गरिएको छ।
त्यस्तै, ‘क’, ‘ख’ र ‘ग’ वर्गका बैंक तथा वित्तीय संस्थाका शाखा कार्यालयहरूबाट पनि सर्वसाधारणले नयाँ नोट सटही गर्न सक्ने व्यवस्था गरिएको राष्ट्र बैंकले जनाएको छ।
राष्ट्र बैंकले दशैंतिहारमा नगद आवश्यकताका कारण प्रत्येक वर्षजस्तै यस वर्ष पनि नयाँ नोट सटहीको व्यवस्था गरेको हो।
