सुनसरी । प्रतिनिधिसभा सदस्य निर्वाचनलाई लक्षित गर्दै सुनसरीका भारतसँग जोडिएका सबै सीमा नाका ४८ घण्टाका लागि बन्द गरिने भएको छ।
जिल्ला प्रशासन कार्यालय सुनसरी ले फागुन १८ गते राति १२ बजेदेखि फागुन २१ गते राति १२ बजेसम्म नेपाल–भारत सीमासँग जोडिएका सम्पूर्ण औपचारिक तथा अनौपचारिक नाका बन्द गर्ने निर्णय गरेको जनाएको छ।
प्रशासनले निर्वाचनलाई स्वतन्त्र, निष्पक्ष र भयमुक्त वातावरणमा सम्पन्न गर्न तथा बाह्य प्रभावलाई न्यूनिकरण गर्न यस्तो निर्णय लिइएको स्पष्ट पारेको छ।निर्वाचन अवधिभर सीमा क्षेत्रमा सशस्त्र प्रहरी बल, नेपाल प्रहरी र राष्ट्रिय अनुसन्धान निकायको संयुक्त परिचालन गरिनेछ।
सीमा क्षेत्रका संवेदनशील बिन्दुहरूमा थप चेकपोस्ट स्थापना, सवारीसाधन जाँच, रात्री गस्ती तथा ड्रोनमार्फत निगरानीसमेत बढाइने प्रशासनले जनाएको छ। खुला सीमाको विशेष अवस्थालाई ध्यानमा राख्दै भारतीय सुरक्षा निकायसँग नियमित समन्वय र सूचना आदान–प्रदान भइरहेको बताइएको छ।
दुवै देशका स्थानीय प्रशासनबीच पनि आवश्यक सम्पर्क कायम गरिएको छ। निर्धारित समयावधिमा सर्वसाधारणको नियमित आवतजावत पूर्ण रूपमा रोक लगाइनेछ। अत्यावश्यक सेवा—जस्तै एम्बुलेन्स, बिरामी बोकेको सवारी, कूटनीतिक नियोगका सवारी वा पूर्वस्वीकृत अत्यावश्यक ढुवानी—का हकमा भने सम्बन्धित निकायको अनुमति लिएर मात्र आवतजावत गर्न पाइनेछ।
सीमा नाका बन्द हुँदा दैनिक रूपमा भारत आवतजावत गर्ने मजदुर, साना व्यापारी तथा किनमेलका लागि जाने सर्वसाधारण प्रभावित हुने अनुमान गरिएको छ।
प्रशासनले समयमै वैकल्पिक व्यवस्थापन गर्न र अनावश्यक यात्रा नगर्न आग्रह गरेको छ। निर्वाचनको समयमा धन–बल र बाह्य प्रभाव प्रयोग हुन सक्ने सम्भावनालाई ध्यानमा राख्दै सीमाबाट हुने अवैध नगद, मदिरा, लागुऔषध तथा अन्य सामग्री ओसारपसार रोक्न विशेष निगरानी गरिनेछ।
साथै सीमा आसपासका होटल, लज र भाडाका घरहरूको पनि निगरानी बढाइने जनाइएको छ।
प्रशासनले सर्वसाधारणलाई अफवाहमा नपर्न, शंकास्पद गतिविधि देखिएमा नजिकको सुरक्षा निकायलाई जानकारी गराउन र निर्वाचनलाई शान्तिपूर्ण रूपमा सम्पन्न गर्न सहयोग गर्न आह्वान गरेको छ।
सुनसरी–भारत खुला सीमाको संवेदनशीलतालाई मध्यनजर गर्दै हरेक निर्वाचनमा यस्तै प्रकारको अस्थायी कडाइ गर्ने अभ्यास रहेको प्रशासनले स्मरण गराएको छ।
