सुनसरी-राष्ट्रिय फोटो पत्रकार समूह र एजिङ नेपालको संयुक्त आयोजनामा `तस्बिरमा ज्येष्ठ नागरिक´ फोटो प्रदर्शनी गरिएको छ । ललितपुरको पाटन दरबार क्षेत्रमा अन्तर्राष्ट्रिय ज्येष्ठ नागरिक दिवसको उपलक्ष्यमा हिमाल, पहाड र तराईका ज्येष्ठ नागरिकहरूको तस्बिर प्रदर्शनी गरिएको हो ।
प्रदर्शनीका क्रममा आयोजित कार्यक्रममा ललितपुर महानगरपालिका मेयर चिरी बाबु महर्जनले ललितपुर महानगरपालिकाले ज्येष्ठ नागरिकको सम्मानको सन्दर्भमा जाने बुझे जति काम गरिरहेको भन्दै यस्तो कामलाई प्रभावकारी बनाउन सहकार्यकासाथ अगाडि बढ्न तयार रहेको बताए । उनले राष्ट्रिय फोटो पत्रकार समूह र एजिङ नेपाललाई आगामी वर्ष यस्तै खालको काम गर्दा महानगरसँग सहकार्य गर्न आग्रह पनि गरे ।
उनले प्रदर्शनीमा राखिएका तस्बिरहरू एकदमै राम्रो लागेको भन्दै प्रदर्शनको सफलताको कामना गरे । कार्यक्रममा ज्येष्ठ नागरिकको दैनिकी, मिहिनेत, सफलता, पारिवारिक खुसी, सङ्घर्ष तथा सफलता झल्कने तस्बिर प्रदर्शनी राखिएको कार्यवाहक महासचिव घनश्याम श्रेष्ठले बताए ।
प्रदर्शनीमा राखिएको तस्बिरहरूले नयाँ पुस्तामा उत्साह जगाउनको साथै, ज्येष्ठ नागरिकहरूमा नैरास्यता तथा दुःखीपन हटाउन मद्दत गर्ने अपेक्षा गरिएको छ । फोटो प्रदर्शनीमा देशभरका ४० फोटो पत्रकारले खिचेका ६२ ओटा फोटो राखिएको कार्यक्रम संयोजक गणेश विष्टले जानकारी दिए ।
राष्ट्रिय फोटो पत्रकार समूहले यसअघि विभिन्न स्थानहरूमा बालबालिकाको फोटो तथा पर्यटन प्रवर्द्धनात्मक फोटोहरू प्रदर्शनी आयोजना गर्दै आएको छ ।
