सुनसरी । पशुमा बाँझोपनको समस्या ठुलो चुनौतिको रुपमा देखा परेको पशु चिकित्सकले बताएका छन् ।
कृषकहरुले सञ्चालन गरेका फर्ममा रहेका पशुहरुमा बाँझोपनको समस्या तिव्र रुपले बढिरहेको भेटेनरी अस्पताल तथा पशु सेवा विज्ञ केन्द्र इनरुवाका प्रमुख डा. मनोज कुमार महतोले बताएका छन् ।
नेपालमा सञ्चालनमा रहेका साना देखी ठुला फर्मका पशुहरुमा बाँझोपनको समस्या प्रमुख रुपमा देखिने गरेको डा. महतोले बताए । यो क्रम बर्षेनी बढ्दो क्रममा रहेको छ ।
सुनसरीमा सञ्चालनमा रहेका पशु फार्मका पशुहरु मध्ये २० देखी ३० प्रतिशत पशुहरुमा बाँझोपनको समस्या देखिएको डा. महतोले बताए । जिल्लाभर सञ्चालनमा रहेका फर्महरुमा अध्ययन तथा अनुगमन गर्दा यस्तो तथ्य प्राप्त भएको उनले बताए ।
पशुहरुमा बाँझोपनको समस्या देखिनुको मुख्य कारण पोषणको कमी रहेको छ । उन्नत र विकासे जातका पशु पालन गर्ने तर उनीहरुलाई चाहिने पोषण अनुसार आहारा दिन नसक्दा र नजान्दा पशुहरुमा बाँझोपनको समस्या देखिएको डा. महतोले जानकारी दिए ।
नेपालका अधिकाँस पशुपालक कृषकहरुले पशुलाई पेट भर्नका लागि मात्रै खानेकुरा दिने गरेको, पौष्टिक तत्वको मात्रा मिलाएर खानेकुरा नदिँदा त्यसको असर बाँझोपनमा देखिने गरेको चिकित्सकको भनाई छ ।
बाँझोपन हटाउन पशुलाई उनीहरुको वजन र अवस्था अनुसार पौष्टिक आहारा दिनुपर्ने चिकित्सकले सुझाव दिएका छन् ।
सोमबार इटहरीमा सञ्चालनमा रहेको दुग्ध उत्पादक सहकारी संस्थाले आफ्ना किसानहरुलाई पशुमा लाग्ने समस्याको बारेमा अन्र्तक्रिया गरेको छ । सुनसरी र मोरङका पशुपालक किसानलाई एकै ठाउँमा भेला गरी दुग्ध सहकारीले पशुमा लाग्ने समस्याको बारेमा प्रशिक्षण दिएको हो ।
किसानहरुलाई भेटेनरी अस्पताल तथा पशु सेवा विज्ञ केन्द्र इनरुवाका प्रमुख डा. मनोज कुमार महतोले प्रशिक्षण दिए । डा. महतोले पशुमा देखिने बाँझोपनको समस्या र त्यसको समाधानका लागि पोषण आहाराको बारेमा किसानहरुलाई जानकारी दिए ।
प्रशिक्षणका क्रममा पनि अधिकाँस किसानले पशुमा गर्भधानका क्रममा देखिएका समस्याको बारेमा जिज्ञासा राखेका थिए ।
संस्थाको ४३ औँ स्थापना दिवसको अवसर पारेर दुग्ध सहकारी संस्थाले कार्यक्रम आयोजना गरेको संस्थाका अध्यक्ष खेमनाथ काफ्लेले जानकारी दिए । संस्थाले प्रत्येक बर्ष किसानहरुका लागि विभिन्न कार्यक्रम आयोजना गरी पशुपालनमा प्रोत्साहन गर्दै आएको अध्यक्ष काफ्लेले बताए ।
स्थापना दिवसको अवसर पारेर उत्कृष्ठ किसानहरुलाई सम्मान पनि गरेको छ । सर्वोत्कृष्ठ किसान पुरस्कारबाट संगीता पौडेल, उत्कृष्ठ गोठ व्यवस्थापन गर्ने किसान लक्ष्मी अधिकारी, बढि दुध दिने भैसी पालन पुरस्कार मनोज चौधरी र बढि दुध दिने गाई पालन पुरस्कार ऋषिकेश निरौलालाई पुरस्कृत गरिएको छ । उनीहरुलाई क्रमशः टेबुल पंखा, सिलिङ पंखा, सिलिभरका भाँडा पुरस्कारको रुपमा वितरण गरिएको छ ।
यस्तै संस्थामा काम गर्दै सेवाअवधि पुरा गरी सेवानिवृत्त भएका कर्मचारी गोपाल निरौलालाई सम्मानीत गर्दै विदाई गरेको छ । उनलाई दोसल्ला र सम्मान पत्र प्रदान गरि विदाइ गरिएको हो ।
