इटहरी । १५औं अन्तर्राष्ट्रिय आमन्त्रण इटहरी गोल्डकप फुटबल प्रतियोगिताको सम्पूर्ण तयारी पुरा भएको छ ।
भोली (शनिबार)बाट सुरु हुने प्रतियोगिताका लागि सम्पूण तयारी पुरा भएको आयोजक राष्ट्रिय जागृती क्लबले जनाएको छ । खेल इटहरी रंगशालामा दिउँसो ३ बजेबाट सुरु हुनेछ ।
प्रतियोगिताको उद्घाटन इटहरी उपमहानगरपालिकाका प्रमुख हेमकर्ण पौडेलले गर्नेछन् । उपमहानगरपालिका प्रतियोगिताको संरक्षक रहेको छ ।
भोलीको उद्घाटन खेल आयोजक राष्ट्रिय जागृति क्लब र पाहुना टोली युनाइटेड खर्साङ फुटबल क्लब (यूकेएफसी) बीच प्रतिस्पर्धा हुनेछ ।
गत संस्करणको दोस्रो क्वाटरफाइनल खेलमा आयोजक राष्ट्रिय जागृती क्लब र पाहुना टोली यूकेएफसी बीच प्रतिस्पर्धा भएको थियो । खेलमा राष्ट्रिय जागृती क्लबले पेनाल्टी सुटआउटमा यूकेएफसीलाई पराजित गरेको थियो । यस पटक पनि यी दुई टिम बीच नै प्रतिस्पर्धा हुने भएको हो ।
यस पटक इटहरी गोल्डकपमा ८ टिमको सहभागिता रहेको छ । मच्छिन्द्र फुटबल क्लब काठमाडौं, चर्च ब्वाइज युनाइटेड काठमाडौं, झापा एघार फुटबल क्लब, एनआरटी क्लब काठमाडौं, सगरमाथा युथ क्लब मोरङ, धरान फुटबल क्लब, आयोजक राष्ट्रिय जागृति क्लब र पाहुना टोली भारतको टीम यूकेएफसीको सहभागिता रहेको छ ।
प्रतियोगिताको विजेताले नगद १० लाख र उपविजेताले ५लाख प्राप्त गर्ने आयोजक राष्ट्रिय जागृती क्लबका प्रतियोगिता संयोजक अनुरोध थापाले जानकारी दिए । यस्तै प्रतियोगिताको सर्वोत्कृष्ट खेलाडीलाई नगद १ लाख रुपैयाँ प्रदान गरिने संयोजक थापाले जानकारी दिए ।
