सुनसरी । २५ औँ संस्करणको बुढासुब्बा गोल्डकप फुटबल प्रतियोगितामा आयोजकलाई ६ लाख ६० हजार रुपैयाँ नाफा भएको छ । आयोजक धरान फुटबल क्लबले आइतबार पत्रकार सम्मेलन आयोजना गरी गोल्डकपको आम्दानी तथा खर्च विवरण सार्वजनिक गरेको हो । सार्वजनिक गरिएको आयव्यय अनुसार गोल्डकपलाई भुक्तानी हुन अझै १५ लाख रुपैयाँ बाँकी रहेकाले नाफा अझै बढ्ने क्लबका अध्यक्ष प्रताप तामाङले जानकारी दिए ।
प्रतियोगितामा ६६ लाख ९९ हजार १ सय ५० रुपैयाँ आम्दानी भएको र ६० लाख ४० हजार १ सय रुपैयाँ खर्च भएको जनाइएको छ । धरान उपमहानगरपालिकाका सबै वडा कार्यलयहरुबाट ७ लाख, अखिल नेपाल फुटबल संघ एन्फाबाट ५ लाख र राष्ट्रिय खेलकुद परिषद्बाट ३ लाख गरी १५ लाख रुपैयाँ सहयोग रकम उठ्न बाकी रहेकोले उक्त रकम उठेपछि २१ लख ६० हजार रुपैयाँ बचत हुने अध्यक्ष तामाङले जानकारी दिए ।
प्रतियोगिता सम्पन्न गर्नका लागि सबैभन्दा विदेशमा रहेका धरानेहरु त्यहाँ रहेका विभिन्न संघ संस्थाहरूबाट २० लाख रुपैयाँ सहयोग प्राप्त भएको क्लबले जनाएको छ । धरान उपमहानगरपालिकाको कार्यालयबाट ९ लाख र कोसी प्रदेश खेलकुद विकास बोर्डबाट ५ लाख रुपैयाँ सहयोग प्राप्त भएको अध्यक्ष तामाङले जानकारी दिए ।
क्लबले २५ औँ बुढासुब्बा गोल्डकपको आयोजना गर्दै गर्दा १ करोड २ लाख २५ हजार अनुमानित आय हुने अपेक्षा गरेको थियो । व्यय तर्फ उसले ८० लाख १० हजार हुने अनुमान गरेको थियो । तर प्रदेश खेलकुद विकास बोर्ड र राखेपले दिने भनिएको १० लाख रुपैयाँमा कटौती गरेकाले नाफा घटेको क्लबले जनाएको छ । गत संस्करणमा क्लबलाई १७ लाख बढी नाफा भएको थियो ।
माघ २४ देखी २६ गतेसम्म भएको गोल्डकपको उपाधि न्युरोड टिम एनआरटीले जित्दै नगद १० लाख रुपैयाँ हात पार्दा उपविजेता चर्च ब्वाइज युनाइटेडले ५ लाख रुपैयाँ पाएको थियो ।
