सुनसरी । विगत २५ वर्षदेखि निरन्तर आयोजना हुँदै आएको गोधुली रनिङ कप फुटबल प्रतियोगिता यस पटक रात्रिकालीन समयमा हुने भएको छ । आयोजक गोधुली क्लबले बुधवार पत्रकार सम्मेलन गरी २५ औ संस्करणको प्रतियोगिता पहिलो पटक रात्रिकालीन समयमा आयोजना गरिने जानकारी गराएको हो ।
प्रतियोगिता भोली बिहीबार रात्रिकालीन ७ बजे सुरु हुने क्लबले जनाएको छ । धरान रङ्गशालामा हुने प्रतियोगिता चैत्र २१ गतेसम्म चल्नेछ । अन्तर वडास्तरिय प्रतियोगितामा धरान उपमहानगरका १८ वटा वडाले सहभागिता जनाउनेछन् । धरान उपमहानगरको वडा नम्बर २ र ७ ले यस पटकको प्रतियोगितामा सहभागिता नजनाएको क्लबका उपाध्यक्ष सतिस केसीले जानकारी दिए । प्रतियोगिताको उद्घाटन खेल वडा नम्बर ५ र वडा नम्बर १६ बिच हुनेछ ।
धरानमै पहिलो पटक हुन लागेको रात्रिकालीन गोल्डकपका लागि अस्थायी फ्रल्ड लाइटको व्यवस्था गरिएको उपाध्यक्ष केसीले बताए । प्रतियोगिताको विजेताले रनिङ कपसहित नगद १ लाख ५० हजार रुपैयाँ प्राप्त गर्नेछन् भने उपविजेताले ७५ हजार रुपैयाँ पाउनेछ ।
व्यक्तिगत विधामा उत्कृष्ट खेलाडीलाई १५ हजार, सर्वाधिक गोलकर्ता (हाई स्कोर) लाई ७ हजार ५ सय, उत्कृष्ट डिफेन्डर, उदीयमान खेलाडी, म्यान अफ दि म्याच, उत्कृष्ट गोलकिपर, उत्कृष्ट कोच, तथा उत्कृष्ट मिडफिल्डलाई जनही ५ हजार ५ सय रुपैयाँ प्रदान गरिनेछ । धरान वडा नम्बर १८ का अध्यक्ष नरेन्द्र कुमार राई (प्रवीण) ले विजेता र उपतिजेताका लागि २५/२५ हजार रुपैयाँ पुरस्कार राशिमा थप्ने घोषणा गरेका छन् ।
प्रतियोगिता सम्पन्न गर्न २४ लाख रुपैयाँ खर्च लाग्ने आयोजकले जनाएको छ ।
