सुनसरी । कर्मचारी अभाव भएको भन्दै जिल्ला अस्पताल इनरुवामा रहेको रक्त सञ्चार सेवा केन्द्र ब्लड बैङ्क बन्द भएको छ । अस्पताल स्थापना भएको चार दशकपछि गत वर्षको जेठ ३१ गते ब्लड बैक सञ्चालनमा ल्याइएको थियो ।
इनरुवा नगरपालिका र भोक्राहा नरसिंह गाउँपालिकाको आर्थिक तथा नेपाल रेडक्रस सोसाइटी सुनसरीको सहयोगमा अस्पताल परिसरमा लामो प्रयासपछि रक्त सञ्चार केन्द्र स्थापना गरी सञ्चालनमा ल्याइएको थियो । सञ्चालनमा आएको डेढ वर्षपछि नै रक्त सञ्चार सेवा केन्द्र बन्द भएपछि बिरामी मर्कामा परेका छन् ।
दैनिक चार सय बढी बिरामी उपचारका लागि आउने अस्पतालमा ब्लड बैङ्क सञ्चालनमा आएसँगै सुनसरी सदरमुकाम इनरुवा सहित कोसी, हरिनगर, गढी, रामधुनी र भोक्राहा नरसिंह गाउँपालिका सेवाग्राहीलाई फाइदा पुगेको थियो । ब्लड बैङ्क बन्द भएपछि उपचारका लागि आउने बिरामीलाई रगतकै अभावमा धरान या विराटनगरको अस्पताल रेफर गर्नुपर्ने बाध्यता पुन बल्झिएको छ । अस्पताल प्रशासनले आफूहरूसँग कर्मचारी अभाव भएको र रेडक्रसले कर्मचारी व्यवस्थापन नगरिदिएकाले बन्द गर्नुपर्ने अवस्था आएको जनाएको छ ।
ब्लड बैङ्क स्थापना गर्दै गर्दा अस्पताललेनै कर्मचारी व्यवस्थापन गर्ने ती कर्मचारीलाई आवश्यक परेको खण्डमा रेडक्रसले तालिम दिने मौखिक सहमतिपछि सञ्चालन गरिएको थियो । उक्त सहमति अनुसार अस्पतालमा काम गर्ने कर्मचारीलाईनै ब्लड बैङ्कमा खटाउने गरिएको तत्कालीन मेडिकल सुपरिटेण्डेन डा. देवराज घिमिरेले जानकारी दिए ।
अस्पतालका मेडिकल सुपरिटेन्डेन्ट डा. अमिताभ ठाकुरले आफूहरूसँग ब्लड बैङ्कको लागि दक्ष जनशक्ति नभएको र रेडक्रसले कर्मचारी उपलब्ध नगराउँदा ब्लड बैङ्क बन्द भएको बताए । अस्पतालमा अहिले ५९ जनाको दरबन्दी रहेकोमा २८ जना मात्र कार्यरत रहेको ठाकुरको भनाई छ । अस्पतालले ३२ जना भन्दा बढी कर्मचारी ज्यालादारीको रूपमा नियुक्ति गरे पनि ब्लड बैङ्कको लागि खटाउन नसकेको अस्पताल श्रोतले जानकारी दिएको छ ।
