विराटनगर । सूर्यनारायण सत्यनारायण मोरवैता यादव बहुमुखी क्याम्पस सिरहामा नेपाल विद्यार्थी सङ्घले क्याम्पस सुधार गर्ने एक मात्रै मुख्य एजेन्डा बनाएर स्ववियु निर्वाचनमा होमिएको छ । युवा विद्यार्थीहरूको लोकप्रिय विद्यार्थी नेता पृथ्वीकुमार यादवलाई स्वतन्त्र विद्यार्थी युनियन(स्ववियु) सभापतिको लागि अघि सारेर भोली हुने निर्वाचनको लागि टिम तयार गरी चुनावी मैदानमा होमिएको हो । स्वतन्त्र विद्यार्थी युनियनको मङ्गलवार हुने निर्वाचनमा सिरहा क्याम्पसबाट नेपाल विद्यार्थी सङ्घले एक्लै जित्ने दाबी गरेको छ । त्रिभुवन विश्वविद्यालय अन्तरगतको आङ्गिक क्याम्पसहरू सहित यस क्याम्पसमा पनि भोली स्ववियु निर्वाचन हुँदै छ । पृथ्वीकुमार यादवको नेतृत्वमा टिमको सचिवमा रमेशकुमार यादव, कोषाध्यक्ष पदमा राम यादवसहितको सिङ्गो १७ जनाको टिम चुनावी मैदानमा रहेका छन् ।
सु.सो.मो.या.बहुमुखी क्याम्पस सिरहाका इकाई सभापति नवरत्न साहले सिरहा क्याम्पसमा नेविसंघले एकलौटी जित्ने दाबी गरे । ‘हिजो पनि हामीले नै जितेको ठाउँ हो, केही प्राविधिक कारणले गर्दा सभापतिमा केही समस्या भएको थियो, उनले भने, भोली हुने निर्वाचन हाम्रो पक्षमा छ, जुन हामीले अहिले नै आकलन गरिसकेका छौँ ।’
नेविसंघको तर्फबाट स्ववियु सभापतिका उम्मेदवार पृथ्वीकुमार यादवले क्याम्पसलाई सुधार गरी गुणस्तरीय शिक्षाको लागि आफ्नो उम्मेदवारी रहेको बताए । उनले भने, ‘अहिले पनि विद्यार्थीले गुणस्तरीय शिक्षा प्राप्त गर्न सकेका छैनन्, विद्यार्थी विदेश पलायन भइरहेका छन्, त्यसलाई रोक्नको लागि पनि क्याम्पसको समग्र सुधारको खाँचो रहेको छ ।’ उनले क्याम्पसमा छात्र छात्राको शौचालय, प्रविधिमैत्री शिक्षा, सफा र सुन्दर क्याम्पस परिसर, बगैँचा सहितको खेल मैदानको आफ्नो एजेन्डा रहेकोले निर्वाचित भएपछि ती कामहरू पुरा गर्ने प्रतिबद्धता जनाए । पृथ्वीकुमार चुनावी एजेन्डा भन्दा पनि विद्यार्थीको समस्यामा सधैँ साथमा रहने गरेका छन् । हरेक अप्ठ्यारोमा आफैँ गएर अहिले पनि सहयोगी विद्यार्थी नेताको रूपमा चिनिएका छन् ।
